„Ég byrjaði nú bara að safna þessu fyrir tveimur árum og á þeim tíma hef ég keypt smá söfn hér og þar,“ segir Aron Vignir Sveinsson sem birti áhugaverða auglýsingu í Facebook-hópnum Brask og Brall í dag.
Aron auglýsir þar til sölu fágætt safn af litlum vínflöskum sem hann hefur sankað að sér á undanförnum árum. DV lék forvitni á að vita meira um safnið og hvað kom til að Aron ákvað að auglýsa það til sölu.
„Ástæðan fyrir því að ég er að selja það er sú að það er orðið eitthvað minna um pláss en áður. Þetta er orðið svo mikið og svo er áhuginn líka búinn að minnka fyrir söfnuninni,“ segir Aron sem er 25 ára.
Aðspurður hlær hann þegar hann er spurður hvort hann sé hættur að drekka og sé því að selja safnið. „Nei, nei, alls ekki. Maður er bara ekki mikið í því að drekka margra ára gömul vín. Sumar flöskurnar eru orðnar meira en 50 ára gamlar,“ segir hann.
Aðspurður segist Aron hafa stolist í eina til tvær flöskur í gegnum tíðina en eins og að framan greinir eru margar flöskurnar komnar vel til ára sinna. Það má því gera ráð fyrir að innan um séu sjaldgæfar flöskur.
Aron segir að margir hafi lýst áhuga á safninu en hæsta boð núna séu 60 þúsund krónur. Aðspurður segist hann ekki hafa talið fjöldann en af meðfylgjandi myndum að dæma má gera ráð fyrir að flöskurnar séu nokkur hundruð talsins.
