Blaðamaður Morgunblaðsins sem var á blaðamannafundi rannsóknarnefndar í gær var með forsíðufrétt blaðsins tilbúna í hausnum áður en skýrslan var birt.

Hún birtist svo í fimmdálki á forsíðu blaðsins í dag með stríðsletri:

Ábyrgðin var bankanna!

Vandinn er bara sá að blaðamanninum tókst ekki að fá meðlimi nefndarinnar til að samþykkja þessa túlkun.

Þeir töluðu um að þetta væri samspil þar sem eitt leiddi af öðru, innan banka, eignarhaldsfélaga, stjórnmála, stjórnsýslu og eftirlitskerfis.

Eins og er alveg greinilegt af lestri skýrslunnar. Hún er áfellisdómur yfir öllu sýsteminu.

Þarna hafa verið á ferðinni spilltir og gráðugir bankamenn, lítilþægir, lélegir og vanhæfir stjórnmálamenn, latir og slappir embættismenn, stjórnsýsla sem skortir algjörlega fagmennsku  – og alveg stóreinkennilegar boðleiðir í stjórnkerfi sem einkenndist af geðþótta, klíkuskap og persónupólitík.

Í rauninni finnst manni að þurfi nánast að leysa allt þetta kerfi upp. Kannski setja skilanefnd yfir það. Eftir skýrsluna verður ekki undan því vikist að gera miklar breytingar á íslenska stjórnkerfinu.