Össur Skarphéðinsson segir að einhverjir aðrir geti borið töskur Ólafs Ragnars Grímssonar. Hann greinir frá því að ástæðan fyrir því að hann fer ekki með forsetanum til Indlands sé synjun hans á Icesave lögunum.

Það er vík milli þessara gömlu vina og samherja sem í eina tíð brölluðu margt saman, til dæmis á Þjóðviljanum.

En þetta er svosem ekki í fyrsta skipti að Ólafur Ragnar er persona non grata hjá ríkisstjórn.

Það má til dæmis rifja upp heimastjórnarafmælið 2004, en þá fóru vinirnir Davíð Oddsson og Halldór Blöndal í sérstæðan leik sem fólst í því að leyfa Ólafi Ragnari ekki að vera með.

Honum var ekki boðið á viðburði sem tengdust afmælinu eða þá var passað upp á að það væri öruggt að hann kæmist ekki.

Ein skýringin sem var gefin var að forsetaembættið væri yngra en heimastjórnin, og kæmi málið ekkert við. En auðvitað var það bara fyrirsláttur, undirniðri bjó óvild og frekja.