Árni Páll Árnason, formannskandídat í Samfylkingunni, segir að flokkurinn hafi tapað sjálfsmynd sinni í ríkisstjórn með VG.

Samfylkingin hefur reyndar frekar óljósa sjálfsmynd, hún tók upp blairismann af krafti á árunum fyrir hrun, eftir hrunið hefur hún leitað meira í að vera hefðbundinn sósíaldemókrataflokkur. Árni Páll vill greinilega draga flokkinn nær miðjunni – en sósíaldemókratar eru per definitionem til vinstri.

Þess er þó að gæta að Samfylkingin hefur fórnað sáralitlu í þessari stjórn. Henni tókst með ógurlegum pólitískum klókindum að komast beint úr hrunstjórninni í stjórnina sem átti að taka til eftir hrunið – án þess að skipta forystusveit eða þinglið svo nokkru næmi.

Það eru Vinstri grænir sem hafa tapað sjálfsmyndinni. Þeir þurftu að undirgangast prógram Alþjóða gjaldeyrissjóðsins, taka þátt í endurreisn kapítalísks bankakerfis og samþykkja aðildarviðræður við Evrópusambandið.

Þetta hefur nánast eyðilagt flokk þeirra, meðan Samfylkingin hefur í raun hangið ágætlega saman. Helsta „fórn“ hennar er að hafa ekki getað efnt til stóriðjuframkvæmda, hluti flokksmanna er mjög spenntur fyrir slíku, en árferðið bæði hér heima og erlendis hefur reyndar verið þannig að fá tækifæri eru í stjóriðjunni.