Hallgrímur Helgason skrifar grein um Vafningsmálið. Í henni eru ýmsar áleitnar spurningar um það sem var á seyði í viðskipta- og efnhagslífinu árið 2008. Jú, greinin er umdeild og það eru ýmsar ástæður fyrir því.

En það var strax farið að hjóla í persónu Hallgríms – hann er kallaður „brjóstmylkingur“ útrásarinnar, hvað sem það þýðir.

Margir auðguðust á útrásartímanum, en Hallgrímur var örugglega ekki í þeim hópi.

Svo er sífellt verið að tala um óséða málverkið eftir hann.

Sagan er þannig að á hámarki útrásarinnar var haldin góðgerðasamkoma á vegum UNICEF, Barnahjálpar Sameinuðu þjóðanna – Roger Moore kom til Íslands af þessu tilefni. Þetta var 1. desember árið 2005.

Samkomuna sótti aðallega efnað fólk, meðal annars útrásarvíkingar, og var eitt skemmtiatriðið uppboð á ýmsum hlutum. Fyrr um daginn höfðu ýmis stórfyrirtæki þess tíma heitið UNICEF háum styrkjum.

Meðal þess sem var boðið upp var málverk eftir Hallgrím – ómálað verk.

Uppboðið fór dálítið úr böndunum, miðað við hvernig svona atburðir fara oftast fram á Íslandi. Málverkið eftir Hallgrím var slegið á 20 milljónir. Það er sagt að á þessari samkomu hafi verið almennt fyllerí. Enginn hafði búist við því að ómálað verk yrði slegið á slíkan pening – og allra síst Hallgrímur.

Þorsteinn sem á þeim tíma var kenndur við Kók keypti verkið – og vegna þess að þetta var góðgerðasamkoma runnu peningarnir til UNICEF en ekki í vasa Hallgríms.

Hallgrímur málaði verkið síðar og það leit svona út, þetta er Mammon sjálfur að aka eftir Sæbrautinni. Óneitanlega nokkuð glúrin mynd.

Eins og ég segi eru áleitnar spurningar í grein Hallgríms. Hann er líka í viðtali við Smuguna þar sem hann segir að hann hafi ákveðið að skrifa greinina þegar nokkrir úr „mínu liði“ fóru að kjósa með Bjarna Benediktssyni.

Þar er Hallgrímur kominn út á dálítið hálan ís – það fer eiginlega best á því að listamenn, sem og fjölmiðlamenn, séu í engu liði.