Í Noregi er umræðan um Evrópusambandið á þann veg að Norðmenn séu að taka við alltof mörgum tilskipunum í gegnum EES samninginn án þess að hafa nokkur áhrif þar á. Meðal þeirra sem þykir nóg komið er stjórnarflokkurinn SV – eða Sósíalíski vinstriflokkurinn, systurflokkur Vinstri grænna á Íslandi.

Það er sagt að tilskipanirnar séu átta þúsund á tíma EES samningsins.

Norðmenn hafa þó allmiklu meiri áhrif í Brussel en Íslendingar. Þeir hafa fjölmennt lið þar sem starfar við alls konar lobbýisma í kringum EES – þeir hafa talið það nauðsynlegt til að geta einhverju ráðið. Norðmenn hafa mjög fjölmennt sendiráð í Brussel og hérna má sjá lista yfir fjölda norskra sendiskrifstofa í Brussel. Þær eru bæði á vegum ríkis og einkaaðila.

Á Íslandi er umræðan á nokkuð öðru plani. Þar heldur Ögmundur Jónasson,  einn helsti foringi vinstri manna og ráðherra í ríkisstjórn,  því fram að Evrópusamstarf snúist um að komast í boðsferðir:

„Það er vegna þess að það er búið að fara með flugvélafarma, viku eftir viku eftir viku, mánuð eftir mánuð eftir mánuð, út til Brussel þar sem menn halda til á kostnað ríkisins.
Þetta fólk ánetjast Evrópusambandinu og vill ólmt halda áfram og fá að fara í fleiri ferðir.  Fleiri ferðir, fleiri hótelferðir, meiri dagpeninga. Það er þetta sem er að gerast. Það er þess vegna sem stofnanaveldið ánetjast Evrópusambandinu.“