19 ára gamall maður, sem býr í Syðri-Þrændalögum í Noregi, hefur verið dæmdur í 30 daga fangelsi fyrir að hafa skotið og drepið máfa og máfaunga í Lade í Þrándheimi. Undirrétti þótti hafið yfir allan vafa að maðurinn hafi í júlí á síðasta ári klifrað upp á þak Maskebygget í Þrándheimi og drepið máfa og máfaunga, sem þar voru, með því að skjóta þá með loftbyssu og sparka í þá og traðka á þeim.

Sú tegund máfa, stormmáfar, sem maðurinn drap er friðuð í Noregi og algjörlega óheimilt að drepa fugla af þeirri tegund.

Maðurinn neitaði sök í málinu en það gagnaðist lítið og var hann dæmdur í 30 daga skilorðsbundið fangelsi auk 120 klukkustunda samfélagsþjónustu. Auk þess þarf hann að greiða 3.000 norskar krónur í sekt.

Dagbladet segir að maðurinn, sem hefur áður hlotið dóm fyrir ofbeldisbrot og að hafa migið á lögreglubíl, tók sér frest til að ákveða hvort hann áfrýi dómnum.