Undirréttur í Glostrup í Danmörku hefur dæmt 58 ára karlmann í 9 ára fangelsi fyrir að stefna lífi annarra í hættu með því að kveikja í íbúð sinni og í framhaldi af því að hafa reynt að myrða tvö ung börn sín. Þetta átti sér stað í ágúst á síðasta ári.
Maðurinn byrjaði á að kveikja í íbúð sinni á Thorvaldsensvej á Friðriksbergi í Kaupmannahöfn. Hann vætti pappakassa í bensíni og bar síðan eld að honum. Í kassanum voru nokkur ílát með eldfimum vökva. Eldurinn breiddist út um íbúðina en sem betur fer sluppu aðrir íbúar í stigaganginum ómeiddir frá þessu.
Eftir að hafa kveikt í ók maðurinn til Rødover þar sem hann lagði bíl sínum á iðnaðarsvæði. Með honum í för voru tvö börn hans, tveggja og sjö ára. Þau sváfu í aftursætinu. Maðurinn leiddi slöngu frá útblástursrörinu inn í bílinn og gangsetti síðan bílinn sem fylltist fljótt af reyk. Af óþekktum ástæðum tókst honum ekki að myrða börnin.
Maðurinn og börnin fundust í bílnum um klukkan sjö um morguninn.
Maðurinn játaði að hafa kveikt í íbúðinni en neitaði að hafa ætlað að myrða börnin sín.
