Bandaríski hagfræðingurinn og rithöfundurinn Jeffrey Sachs segir í viðtali á Bloomberg að mál hefðu aldrei átt að fá að þróast á þann veg sem þau hafa gert í Grikklandi. Þarna sé að verki afar léleg hagstjórn frá hlið Evrópusambandsins og mikill þvergirðingur af hálfu Þjóðverja.

Það vekur reyndar athygli – og þetta er ekki hluti af því sem Sachs segir – að það er eins og málið sé einungis milli Grikkja og Þjóðverja. Tsipras leggur eitthvað til og Merkel og Schäuble skjóta það jafnharðan niður. Eru Þjóðverjar algjörlega búnir að taka völdin í ESB?

Sachs segir að Þjóðverjar hafi ákveðið að þeir vildu í raun ekki semja við vinstri stjórnina í Grikklandi – og að þeir vilji ýta Grikkland út úr evrunni. Það sé hins vegar ekki hægt, þeir geti ýtt Grikkjum út í hrun og örvæntingu, en það sé engin útgönguleið út úr evrunni.

Sachs segist hafa skoðað mál Grikklands ásamt fleiri bandarískum hagfræðingum, þeir telji að niðurskurður á skuldum sé réttmætur. Þjóðverjar séu hins vegar harðir á því að ekkert slíkt sé í boði – og þess vegna sé allt komið í óefni. Það sé ótrúlegt að hlusta á fjármálaráðherra Bandaríkjanna lýsa því yfir að Grikkland þurfi skuldaleiðréttingu á sama tíma og ESB segir að slíkt komi ekki til greina.

Greiðslufall Grikkja hafi verið óhjákvæmilegt, segir Sachs, þeir geti ekki borgað skuldirnar, en meðfram greiðslufallinu sjáum við nú stórt áhlaup á banka ofan á kreppu sem er orðin jafn djúp og Kreppan mikla á fjórða áratugnum.

Sachs segir að lausnin sé fólgin í greiðslufalli Grikklands á sama tíma og landið heldur áfram í evrunni. Um leið þurfi að skera hraustlega af skuldum Grikkja. En til skemmri tíma þurfi skuldafrí og aðstoð til Grikkja svo þeir geti opnað bankakerfi sitt aftur.