Á vef stjórnarráðsins segir frá því að Unnsteinn Jóhannsson og Sigrún Gunnarsdóttir hafi verið valin til þess að gegna starfi aðstoðarmanna heilbrigðisráðherra sem er Óttarr Proppé. Auk heilbrigðismála eru á sviði ráðuneytisins önnur mál sem eru til dæmis á sviði lýðheilsu- og forvarna, almannatrygginga, svo sem sjúkratrygginga, slysatrygginga og sjúklingatrygginga, lífvísinda og lífsiðfræði.
Samkvæmt tilkynningunni er Unnsteinn fæddur árið 1986 og hefur víðtæka reynslu þrátt fyrir ungan aldur og það ekki aðeins pólitíska reynslu.
Í tillkynningunni segir um Unnstein að hann hafi „frá árinu 2015 starfað sem aðstoðarmaður formanns Bjartrar framtíðar og meðal annars sinnt ýmsum verkefnum fyrir þingflokkinn sem og innra starfi Bjartrar framtíðar. Árin 2013–2015 var hann framkvæmdastjóri Landssambands æskulýðsfélaga og 2012–2013 verkefnastjóri fyrir Bandalag íslenskra skáta. Unnsteinn er menntaður KaosPilot, þ.e. nám í skapandi verkefnastjórnun sem hann stundaði í Hollandi og Danmörku árin 2008–2012. Áður lauk hann námi af listnámsbraut Iðnskólans í Hafnarfirði. Unnsteinn hefur verið virkur í félagsstörfum, meðal annars verið varaformaður Samtakanna ´78, setið í stjórn Bjartrar framtíðar, stjórn skátafélagsins Vífils og stjórn nemendafélags Iðnskólans í Hafnarfirði. Hann hefur einnig komið að ýmsum verkefnum, svo sem fjáröflun fyrir baráttu hinsegin fólks í Úganda fyrir Samtökin ´78 og Íslandsdeild Amnesty International, verið virkur í starfi skátahreyfingarinnar og um nokkurra mánaða skeið árið 2011 var hann í starfsnámi fyrir The Peace Foundation í Auckland á Nýja Sjálandi þar sem hann kom meðal annars að því að setja upp markaðsáætlanir og annast ráðgjöf tengdri innri starfsemi samtakanna. Unnsteinn sat í 3. sæti lista Bjartrar framtíðar í Reykjavík suður í alþingiskosningum 2016.“
26 ára aldursmunur milli aðstoðarmanna heilbrigðisráðherra
Sigrún er fædd árið 1960 þannig að það er 26 ára aldursmunur á aðstoðarmönnum ráðherrans en bæði eru væntanlega aðdáendur hljómsveitarinnar HAM eða í versta falli verða það eftir að hafa fengið þetta djobb. Sigrún er með hjúkrunarfræðimenntun að baki frá Háskólanum á Íslandi og með doktorsgráðu á sviði lýðheilsu og stefnumótunar frá London School of Hygiene & Tropical Medicine. Um hana segir í tillkynningu frá stjórnarráðinu:
Sigrún hefur víðtæka reynslu á sviði heilbrigðismála og stjórnsýslu, auk þess sem hún hefur starfað við kennslu á sviði heilbrigðismála, stjórnunar og forystu, sinnt rannsóknum og skrifað fjölda fræðigreina. Hún hefur einnig tekið virkan þátt í félagsmálum og gegnt þingmennsku sem varaþingmaður Bjartrar framtíðar 2013 og 2014 og er nú varaþingmaður flokksins. Sigrún hefur starfað sem dósent á viðskiptafræðideild Háskóla Íslands, á viðskiptasviði Háskólans á Bifröst og í hjúkrunarfræðideild Háskóla Íslands. Sigrún hefur leitt starf Þekkingarseturs um þjónandi forystu, verið formaður stjórnar Krabbameinsfélags Íslands og varaformaður samstarfsnets um rannsóknir um starfsumhverfi í heilbrigðisþjónustu, NOVO. Af fyrri störfum Sigrúnar má nefna deildarstjórastöðu starfsmannamála á Landspítala og stöðu gæðastjóra þar, verkefnisstjórastöðu á sviði heilsueflingar hjá heilbrigðisráðuneytinu og stöðu deildarstjóra á Heilsugæslustöðinni á Seltjarnarnesi. Einnig hefur hún verið formaður Félags háskólamenntaðra hjúkrunarfræðinga. Sigrún hefur um langt árabil starfað sem ráðgjafi hjá skrifstofu Alþjóðaheilbrigðismálastofnunarinnar í Kaupmannahöfn.
Börkur Gunnarsson gerði útdráttinn.
