Gunnar Kristinn Þórðarsson er enn í Framsóknarflokknum og fréttir af brottrekstri hans úr flokknum séu á misskilningi byggðar, þetta segir Einar Gunnar Einarsson framkvæmdastjóri Framsóknarflokksins. Eyjan greindi frá því í morgun að Gunnar Kristinn hefði sagt að hann hefði verið rekinn úr flokknum, aftur, eftir að hafa skorað á Sigmund Davíð Gunnlaugsson þingmann flokksins að yfirgefa Framsókn og stofna sinn eigin flokk.

Sjá frétt: Gunnar: Ég var rekinn úr Framsóknarflokknum – Aftur

Gunnar Kristinn segir í samtali við Eyjuna að hann sé ekki viss hvort hann sé enn í flokknum:

Ég er ekki alveg viss hverju ég á að trúa, ég var rekinn úr flokknum eftir landsfundinn síðasta haust þegar ég skoraði á Sigmund Davíð að stofna nýjan flokk. Ég á það skjalfest að ég var rekinn úr flokknum, það á víst að hafa verið mistök. Síðast fékk ég fréttabréf flokksins í lok mars, í byrjun apríl fór ég í viðtal þar sem ég skoraði á Sigmund að yfirgefa flokkinn. Í apríl fékk ég ekki fréttabréf og heyrði það hjá innanbúðarmanni að það væri búið að reka mig aftur úr flokknum,

segir Gunnar Kristinn. Hann segir að Sigmundur eigi mörg hundruð stuðningsmenn innan flokksins og að Sigmundur Davíð hafi góðan stuðning ef hann stofnaði sinn eigin flokk, hann vilji hins vegar áfram vera í Framsóknarflokknum á meðan Sigmundur er enn þingmaður flokksins.

Sveinn Hjörtur Guðfinnsson formaður Framsóknarfélags Reykjavíkur segir í samtali við Eyjuna að hann trúi því ekki að Gunnar Kristinn hafi verið rekinn úr flokknum í byrjun mánaðarins þar sem slíkt myndi stangast á við lög flokksins. Í kjölfar landsfundar flokksins síðasta haust hafi Gunnar óskað eftir því að vera tekinn af lista flokksins en honum hefði verið vikið úr flokknum alfarið, það hafi verið skýrt sem misskilningur. Aðspurður um hvort það geti verið tilviljun eða misskilningur að Gunnar hafi ekki fengið fréttabréf flokksins í apríl, segir Sveinn Hjörtur:

Ég ætla ekki að segja til um það, en það er þá mjög sérstök tilviljun. Eftir því sem ég best veit er Gunnar enn skráður í flokkinn, en hann fékk ekki síðasta fréttabréf, sem má að öllum líkindum rekja til mistaka á skrifstofu flokksins.