Þrír stjórnarmenn og framkvæmdastjóri LBI, sem heldur utan um eignir gamla Landsbankans, skiptu á milli sín rúmlega 370 milljónum króna í bónus vegna vegna ákvörðunar Landsbankans um að hraða endurgreiðslu á skuld sinni við LBI. Greint er frá þessu í Markaðnum í dag. Landsbankinn tilkynnti í lok júní að hann hefði greitt 16,2 milljarða inn á skuld sína við LBI og þannig að fullu gert upp eftirstöðvar skuldabréfa í erlendri mynt sem voru gefin út til slitabús gamla Landsbankans 2009, níu árum á undan áætlun.

Bónuskerfi LBI virkjaðist í fyrra og samkvæmt því fá stjórnendurnir því rúmlega 90 milljónir á mann. Landsbankinn hafði mikinn hag af því að gera upp skuld sína við LBI til að spara fjármagnskostnað og ákvað hann því að greiða upp skuldina en stjórnendur, Kolbeinn Árnason, Richard Katz og Christian Anders Digemose og framkvæmdastjóri LBI, Ársæll Hafsteinsson, höfðu enga aðkomu að ákvörðun Landsbankans. Stjórnarmenn LBI hafa þó þegar vegleg laun, sem dæmi fær Kolbeinn rúmlega 24 milljónir króna fyrir að starfa 40 daga á ári, alls 320 klukkutíma, fyrir LBI.