Ragnar Þór Ingólfsson formaður VR segir að hann viti að það verði farið gegn sér, það hafi verið farið kerfisbundið gegn formönnunum fyrrverandi Stefáni Einari Stefánssyni og Kristni Erni Jóhannessyni: „Ég væri kjáni ef ég héldi að það sama ætti ekki við um mig. Ég veit að það verður farið gegn mér, en mér er alveg sama,“ segir Ragnar Þór í viðtali við Kolbrúnu Bergþórsdóttur í helgarblaði DV. Ragnar Þór segir að hann sé draumastarfinu:

Ég er með tveggja ára ráðningarsamning við félagsmenn mína. Það er draumastarf að fá að vinna við hugsjónir sínar. Ég lifi fyrir þetta. Ef það er eftirspurn eftir mér í þessari stöðu mun ég örugglega halda áfram ef ekki mun ég kveðja sáttur,

segir Ragnar Þór. Hann hefur vakið mikla athylgi frá því hann var kjörinn formaður VR, stærsta stéttarfélags landsins, í vor. Hefur hann talað hátt fyrir kerfisbreytingum:

Sama hvaða formaður er við völd í VR þá geta félagsmenn andað rólega því starfsmenn félagsins halda daglegum rekstri áfram hvað sem á dynur í verkalýðspólitíkinni og það er mikill sómi að þeim mannauð.

Það er fólksins að ákveða hvaða áherslur það vill. Ef fólk er sátt við kerfið eins og það er og ánægt með verkalýðshreyfinguna og aðgerðaleysi hennar og þá pólitík sem hún stundar þá er það bara þannig. Ég mun taka því eins og maður.

Ég hef mínar skoðanir og mun reyna að hafa áhrif á pólitíkina með skrifum og hugmyndum. Á einhverjum tímapunkti mun eitthvað breytast. Ef ég hefði ekki trú á því þá gæti ég ekki staðið í þessu. Það sem skiptir mig mestu máli er að geta sagt við börnin mín: Ég gerði mitt allra besta.