Svandís Svavarsdóttir þingflokksformaður Vinstri grænna vandaði Brynjari Níelssyni þingmanni Sjálfstæðisflokksins ekki kveðjurnar í ræðu sinni á Alþingi í gærkvöldi og sagði hún djúpstæða leyndarhyggju hans verða að heyra sögunni til. Sagði Svandís að fall ríkisstjórnarinnar sé hluti af femínískri baráttusögu þar sem kröfur þeirra sem höfðu hátt náðu yfirhöndinni yfir hefðbundna mælikvarða á borð við hagvöxt:

Fjölskyldur og fulltrúar brotaþola Róberts Downeys vöktu máls á þessum úrelta lagabókstaf og þessari fráleitu framkvæmd, settu málið á dagskrá, ræddu uppreist æru og líka endurheimt lögmannsréttinda með dómi,

sagði Svandís. Það hafi svo komið í ljós þegar stjórnskipunar- og eftirlitsnefnd tók málið fyrst til skoðunar í júlí að stjórnsýslan að því er varðar uppreist æru sé til skammar og hafi verið til skammar um mjög langt árabil. Sagði Svandís að dómsmálaráðuneytið hafi skapað tortryggni með óþarfa leyndarhyggju:

Því miður er það svo að þessi leyndarhyggja og þessi nálgun á þessi mál er líka mjög djúpstæð meðal ýmissa stjórnmálamanna. Í stjórnskipunar- og eftirlitsnefnd fjallaði formaður nefndarinnar um málið ítrekað af ákveðnu alvöruleysi og yfirlæti sem að mínu mati sæmir ekki formanni eftirlitsnefndar þingsins, gerði því skóna að þessi gögn skiptu engu máli, að enginn hefði neitt með það að biðja um þau eða skoða þau o.s.frv. En annað hefur komið á daginn.

Vísar Svandís til Brynjars Níelssonar þingmanns Sjálfstæðisflokksins:

Þessi sjónarmið sem fyrrverandi formaður stjórnskipunar- og eftirlitsnefndar stóð fyrir í umræðunni eru sjónarmið sem verða að heyra sögunni til.

Sömu sjónarmið hafi heyrst í málflutningi Bjarna Benediktssonar forsætisráðherra:

Lítið gert úr málunum, ákveðið yfirlæti, talað niður til þeirra sem vilja halda umræðunni opinni og á lofti. Þessi tími verður að vera liðinn. Við verðum að sýna brotaþolum þá virðingu og sýna þessari femínísku bylgju þann skilning að takast á við áhrif hennar með opnum huga, hlusta og bregðast við.