Sóley Tómasdóttir fyrrverandi oddviti Vinstri grænna í Reykjavík segir málflutning Katrínar Jakobsdóttur formanns Vinstri grænna og Kolbein Óttarsonar Proppé vera til marks um skilningsleysi og vera eiginlega móðgun.

Í viðtali á Vísi í gær sagði Katrín að hún stefndi á að leiða félagshyggjustjórn eftir kosningar og að flokkurinn eigi að fara fram með sömu áherslur og fyrir síðustu kosningar. Í grein í Fréttablaðinu í dag tekur Kolbeinn í sama streng og segir kosningarnar tækifæri til að sýna það í verki að Vinstri grænir vilji að samfélaginu sé stýrt á félagslegum forsendum.

Sóley segir á Fésbók í dag að málflutningur þeirra sé móðgun:

Eins vænt og mér þykir um stefnu og hugmyndafræði hreyfingarinnar, þá finnst mér þetta til marks um skilningsleysi og eiginlega móðgun við fólkið sem bylti,

segir Sóley og bætir við:

Þetta einstaka tækifæri sem okkur gefst nú til að hafna Sjálfstæðisflokknum datt ekki af himnum ofan. Það varð til vegna þess að samfélaginu blöskraði hversu léttvægt hefur verið farið með málaflokk kynferðisbrota, allt frá nauðgunarmenningunni sem elur þau af sér til uppreistar æru glæpamannanna.

Segir hún það að halda áfram með óbreytta stefnu sé taktlaust og óviðeigandi:

Þessi kosningabarátta má vel snúast um fátækt, hag þeirra sem verst standa, samneyslu og opna stjórnsýslu. En það verður að gerast á femínískum forsendum. Það verður að setja það í samhengi við áðurnefnda nauðgunarmenningu, samtryggingu ofbeldismannanna, úrræðaleysi fátækra kvenna í ofbeldissamböndum og stjórnsýsluna sem tekur ekki á þessum málum.

Sóley segir kvenfrelsi hljóti að eiga að vera kjarni kosningabaráttunnar í ár, líkt og félagslegt réttlæti var kjarni kosningabaráttunnar eftir hrun:

Það er miður að sjá hvorki votta fyrir femínískri hugmyndafræði í þessari grein né áherslum formannsins í viðtali við Vísi í gær. En vonandi verður breyting þar á fyrir kosningar.