Aðalsteinn Kjartansson, fréttamaður á RÚV, og Ingibjörg Dögg Kjartansdóttir, annar ritstjóri Stundarinnar, eru systkini. Þau hafa ekki gert mikið til þess að fela þessa staðreynd en Birni Bjarnasyni, fyrrverandi ráðherra og náfrænda Bjarna Benediktssonar, forsætisráðherra, virðist hafa verið nokkuð brugðið þegar hann komst að þessum blóðtengslum á sunnudaginn.
Björn lét þennan ættfræðimola fljóta með í harði gagnrýni á vefsíðu sinni á fréttir Stundarinnar og RÚV um Bjarna Benediktsson forsætisráðherra upp úr gögnum frá þrotabúi Glitnis.
Aðalsteinn brást við þessu útspili Björns á Facebook með því að gera grín að rannsóknarblaðamannshæfileikum Björns:
Víða leynast rannsóknarblaðamennirnir! Nú hefur það verið afhjúpað að við Ingibjörg Dögg séum systkini. Ekkert getur leynt farið lengur.
Jón Trausti Reynisson, hinn ritstjóri Stundarinnar, svaraði Birni einnig á Facebook og furðar sig á að kjarni þessa máls sé að fréttamaður á RÚV er bróðir ritstjóra Stundarinnar og því þurfi að leggja RÚV niður eftir að báðir miðlar hafi fjallað um samskipti Bjarna Ben. og Glitnis:
Íslensk stjórnmál:
1. Það skiptir höfuðmáli að fréttamaður á RÚV er bróðir ritstjóra Stundarinnar. Því þurfi að leggja niður RÚV eftir umfjöllun um viðskipti og hagsmunaárekstra forsætisráðherra og fjölskyldu hans.
2. Það skiptir engu máli að nánustu ættingjar þingmanns forði milljörðum út úr banka og sjóðum banka á sama tíma og þingmaðurinn er á kafi í innstu vandræðum bankans sem kjörinn fulltrúi – og samhliða því að hann sjálfur forðar stórfé – sem hann sagði ósatt um.
