Unnur Brá Konráðsdóttir, forseti Alþingis og þingkona Sjálfstæðisflokksins, hrósaði samflokksmanni sínum Brynjari Níelssyni á Facebook á laugardaginn þar sem hún sagði hann vera mesta töffara landsins.

Þessa nafnbót sæmdi forseti Alþingis þingmanninn með þessum orðum:

Þú ert landsins mesti töffari!

eftir að Brynjar gaf eftir fyrsta sæti á framboðslista flokksins í  Reykjavík suður. Hann ákvað að víkja fyrir Sigríði Andersen dómsmálaráðherra sem skipar því efsta sætið en Brynjar sest í annað sætið.

Illu heilli fyrir Unni Brá sjálfa virðast sjálfstæðiskarlar í hennar kjördæmi, Suðurkjördæmi, ekkert of uppteknir af því að sýna karlmennsku, þor og töffaratakta.

Þar eru fyrir á fleti í efstu sætum þeir Páll Magnússon og Ásmundur Friðriksson en Unni Brá hefur verið stillt upp í fjórða sæti, sem hlýtur að teljast fallbaráttusæti. Hún hefur þvert á flokkalínur, þótt standa sig ákaflega vel sem þingforseti en ekki dugði það henni til þess að karlarnir í kringum hana stæðu upp fyrir henni og tryggðu henni öruggt þingsæti.

Munurinn er sjálfsgat fyrst og fremst sá að Brynjar stofnar sæti sínu í takmarkaða hættu með töffaratöktunum í Reykjavík. Þótt töffarafræðin geri almennt ráð fyrir því að alvöru töffarar öðlist þá nafnbót með því að leggja allt undir og taka sénsinn án þess að hugsa um eigin hag.