Katrín Jakobsdóttir, formaður Vinstri grænna, er sögð reyna til þrautar að koma á samtali milli Vinstri grænna, Sjálfstæðisflokks og Samfylkingar um mögulega stjórnarmyndun.

Þetta kemur fram í Fréttablaðinu í dag.

Eins og greint var frá í gær slitnaði upp úr stjórnarmyndunarviðræðum VG, Framsóknar, Samfylkingar og Pírata og var ástæðan meðal annars sögð vera tæpur meirihluti.

Færi svo að VG, Sjálfstæðisflokkur og Samfylking mynduðu stjórn væru þessir þrír flokkar með 34 þingmenn gegn 29 þingmönnum stjórnarandstöðunnar.
„Logi Einarsson og Bjarni Benediktsson hafa þó ekki ræðst við beint, en Katrín ræðir mjög við þá báða og reynir nú til þrautar að koma á samtali milli þessara þriggja flokka,“ segir í grein Fréttablaðsins í dag sem vísar í heimildir sínar.

Heimildarmenn blaðsins segja þó að öllum möguleikum sé haldið opnum og þannig hafi Framsóknarmenn þrýst á samtal milli Sjálfstæðisflokks, Framsóknarflokks og Vinstri grænna. Þeir Sjálfstæðismenn sem blaðið ræddi við eru helst sagðir vilja mynda stjórn með Vinstri grænum og Samfylkingu eða Framsóknarflokki. Líklega sé þó engra sérstakra tíðinda að vænta fyrr en upp úr miðri viku.