Bjarni Benediktsson formaður Sjálfstæðisflokksins er opinn fyrir ríkisstjórnarsamstarfi með Vinstri grænum og segir að það kunni að vera að myndun breiðrar ríkisstjórnar sé það sem fólk sé að kalla eftir. Sjálfstæðisflokkurinn og Vinstri græn mælast stærstu flokkarnir í skoðanakönnunum að undanförnu og má því slá því á föstu að annar hvor flokkurinn verður í næstu ríkisstjórn. Fylgi flokkanna hefur sveiflast lítillega í könnunum að undanförnu og þar sem ekki liggur fyrir hvort, eða hvaða, flokkar sem mælast með fylgi í kringum 5 prósenta þröskuldinn ná inn á þing þá er ómögulegt að sjá hvort Vinstri græn og Sjálfstæðisflokkur verði með nógu marga þingmenn til að mynda tveggja flokka stjórn.

Bjarni segir í kosningaþætti Hringbrautar að það sé möguleiki á að mynda stjórn með Vinstri grænum eftir kosningar:

Einhver möguleiki er á því. Við reyndum það í fyrra. Ég sagði þá og ég get sagt nákvæmlega sama hlutinn núna. Mér finnst, ef við horfum yfir stöðuna í samfélaginu, hvar erum við stödd í þessari hagsveiflu, hver er staðan á Íslandi. Þá segi ég, við þessar aðstæður, þær aðstæður sem eru núna uppi, þá eru meiri líkur á því að flokkar sem hafa langt á milli sín í stærri stefnumálum geti náð saman heldur en í kreppu,

segir Bjarni. Bjarni var ekki viss hvort ríkisstjórnarsamstarf með Vinstri grænum væri afleitur leikur eða hvort það myndi auka stöðugleika í stjórnmálunum:

Það kann að vera að myndun breiðrar ríkisstjórnar eftir allan þann óróa sem hefur verið á pólitíska sviðinu sé það sem fólk er að kalla eftir. Að fólk sjái að fólk sé tilbúið að teygja sig til andstæðinga sinna til þess að leita að bestu mögulegu lausn við þær aðstæður sem við búum við núna fyrir landsmenn alla.

Katrín Jakobsdóttir formaður Vinstri grænna hefur ekki viljað útiloka samstarf við Sjálfstæðisflokkinn, en hún hefur sagt að hún vilji frekar reyna að mynda stjórn með flokkum til vinstri og á miðjunni, aðspurð hvers vegna hún vilji ekki útiloka Sjálfstæðisflokkinn fyrir kosningar sagði Katrín:

Þetta snýst um að læra af reynslunni. Fyrir síðustu kosningar gerðu flokkar fátt annað en að útiloka hver annan og það skilaði sér í nokkurra mánaða taugatitringi eftir kosningar. Ég segi bara alveg skýrt og klárt, við erum með stefnuna, við viljum fara í uppbyggingu á samfélagsinnviðum, við erum búin að leggja fram hvernig það er hægt. Við viljum leiða ríkisstjórn sem hefur þessi markmið með þeim sem vilja vinna með okkur.