Nú heyrir maður að ríkisstjórnin ætli loks að ráðast í framkvæmdir við Hús íslenskra fræða vestur á Melum – eða Holu íslenskra fræða eins og það hefur verið kallað.

Gísli Marteinn Baldursson skrifar harða ádrepu um bygginguna undir fyrirsögninni Hús íslenskra bílastæða. Hann segir að húsið sé meingallað, það kallist ekki á við byggðina í kring en einkum er hann gagnrýninn á hversu mikið pláss á að fara undir bílastæði.

Sigurtillagan í samkeppni um húsið er mjög gölluð finnst mér, einsog ég skrifaði um fyrir næstum 10 árum (síðan ég skrifaði pistilinn hefur vef þar sem myndir af því voru sýndar verið lokað og myndirnar því horfnar). Húsið er stakstætt, tekur engan þátt í að skapa götulíf á þessum verðmæta stað, lætur eins og Suðurgatan sé ekki til og þannig mætti áfram telja. Þetta verðmæta land ætti að nýta miklu betur. Reyndar er það svo að á vef stjórnarráðsins er húsið sýnt einsog það sé uppí sveit, eða á Þingvöllum, en ekki í einni þéttustu og eftirsóttustu byggð á landinu.

 

Nánar segir Gísli um bílastæðin:

En það sem mér finnst einna ótrúlegast við þetta hús er að heildar-fermetrafjöldi á að vera um 8700 og þar af á bílakjallari að vera 2200 fermetrar. Með öðrum orðum er 1/4 af Húsi íslenskunnar, Hús íslenskra bílastæða. Húsið mun kosta meira en 4 milljarða og þótt bílastæðin muni sjálfsagt kosta minna en fjórðung þess, hleypur kostnaður við þau á hundruðum milljóna.

Sem er skrýtið í ljósi þess hvar húsið er staðsett. Hér má sjá Holu íslenskra fræða og þau bílastæði sem þar eru allt í kring, ókeypis.