„Ég hitti Ævar í fyrra og þá sagði hann mér frá lestrarátaki sínu sem leiddi til þess að ég styrkti það. Hér er um einhver mistök að ræða og hann mun fá styrk. Að minnsta kosti jafnháan styrk og í fyrra,“ segir Illugi Gunnarsson menntamálaráðherra í Morgunblaðinu í dag.

Eins og DV.is greindi frá í gær fékk Ævar Þór Benediktsson, einnig þekktur sem Ævar vísindamaður, bréf þess efnis að beiðni hans um styrk hefði verið hafnað, en Ævar sóttist eftir styrknum vegna lestrarátaks sem hann hefur staðið fyrir.

Ævar hefur staðið fyrir átakinu síðastliðin tvö ár og fyrir tilstilli hans hafa börn í 1. til 7. bekk um allt land lesið yfir 114 þúsund bækur.

„Þetta árið vildi ég endurtaka leikinn og byrjaði á því að hafa samband við Menntamálaráðuneytið, svo ég þyrfti ekki að leita til fyrirtækja eftir fjármagni, eins og árin á undan. Í fyrra sá ráðuneytið sér fært að styrkja átakið um 100 þúsund krónur. Í ár bað ég um talsvert hærri upphæð, en í styrknum myndu felast m.a. laun fyrir mína vinnu (en ég hef gert þetta í tvö ár nánast kauplaust) ásamt hönnun, ljósmyndun og sendingarkostnaði fyrir plaköt auk annars sem tengist átakinu,“ sagði Ævar í Facebook-færslu í gær.

Hann var því vonsvikinn þegar hann fékk bréfið þar sem fram kom að beiðni hans hefði verið hafnað. En nú er komið á daginn að um mistök var að ræða, Ævar mun fá styrk.

„Þetta eru augljóslega einhver mistök,“ segir Illugi í Morgunblaðinu í dag. Á vef mbl.is kemur fram að Ævar fái styrk upp á 600 þúsund krónur. „Ég hafði sótt um milljón í styrk en fékk sex hundruð þúsund. Það er frábært að fá þessi snöru viðbrögð,“ segir Ævar við mbl.is.