Íslenskir keppendur tóku forystuna fyrsta degi Evrópu- og Afríkuleikana í CrossFit, sem haldin er í Madríd á Spáni. Í kvennaflokki tóku hirtu íslenskar konur öll þrjú efstu sæti keppninnar, þar sem Ragnheiður Sara Sigmundsdóttir frá CrossFit Suðurnes kom sér þægilega fyrir í fyrsta sætinu og á hún titil að verja sem Evrópumeistari í íþróttinni.
“Það gekk næstum því allt eins og ég ætlaði mér,” sagði Ragnheiður Sara þegar DV tók hana tali eftir keppni dagsins. Fyrir keppnina á morgun og á sunnudaginn ætlar Sara að “gefa allt í þetta og ekki hugsa eftir á að ég hefði getað farið harðar.”
Íslendingar voru líka sigursælir í karlaflokki, þar sem Björgvin Karl Guðmundsson frá CrossFit Hengli í Hveragerði bókstaflega bakaði aðra keppendur með því að sigra auðveldlega sína tvo riðla. Fast á hæla Ragnheiðar Söru kom Annie Mist Þórisdóttir frá CrossFit Reykjavík, en Annie hefur tvisvar unnið heimsmeistaratitilinn í CrossFit og verið krýnd hraustasta kona í heimi. Í þriðja sæti kom svo Þuríður Erla Helgadóttir, sem kom flestum á óvart í Caja Mágica-höllinni í dag þegar hún varð fyrst kvenna í heimi til þess að ljúka við æfingu sem fól í sér alls 40 upphífingar í fimleikahringjum, 70 handstöðupressur og 120 ketilbjöllusnaranir.
Í karlaflokki hafnaði Frederik Aegidius, danskur kærasti Anniear Mist sem keppir undir íslenskum fána, í sjöunda sæti eftir fyrsta daginn. Hinrik Ingi Óskarsson, sem keppir líka fyrir CrossFit Reykjavík, endaði í 12. sæti eftir daginn og Sigurður Hafsteinn Jónsson frá CrossFit XY í Garðabæ rataði í 22. sætið.
Í liðaflokki var sænska liðið Nordic OPEX í efsta sætinu, en Íslendingurinn Björk Óðinsdóttir er meðal liðsmanna þess. Í öðru sæti liðakeppninnar var CrossFit Copenhagen, en Oddrún Eik Gylfadóttir og Eiríkur Baldursson keppa með Dönunum. CrossFit Reykjavík kom sér fyrir í fimmta sæti keppninnar, lið CrossFit XY sat í sjöunda sæti og lið CrossFit Sport í þrettánda sæti eftir fyrsta daginn.
Keppninni verður framhaldið strax í fyrramálið en mótinu lýkur á sunnudaginn.
