Brynjar: Fámennur hópur elur á reiði og ólgu í samfélaginu
„Síðan þessi ríkisstjórn tók við hefur tiltölulega fámennur hópur upphlaupsliðs verið duglegur að ala á reiði og ólgu í samfélaginu. Stjórnarandstaðan á þinginu hefur ekki látið sitt eftir liggja. Í stað þess að taka málefnalega umræðu er stöðugt haldið fram röngum fullyrðingum.“
Þetta skrifar Brynjar Níelsson, þingmaður Sjálfstæðisflokksins í pistli á Pressunni. Brynjar segir:
„Fyrst um að ríkisstjórnin væri að lækka veiðigjöld, þótt útgerðin hafi aldrei greitt hærri veiðigjöld. Svo var því haldið fram að hún væri að skera niður í heilbrigðiskerfinu og að hér væri ójöfnuður meiri en annarstaðar þótt hvorttveggja væri alrangt. Allt kallaði þetta á ótal mótmæli.“
Brynjar segir að svo hafi hlaupið á snærið hjá upphlaupsliðinu þegar Panamaskjölin voru kynnt til sögunnar.
„Öllu grautað saman og allir sem einhvern tíma áttu hlut í félagi á lágskattasvæði voru sakaðir um spillingu og skattsvik. Og allt langfeðgatalið er undir og jafnvel tengdaafar og ömmur.“
Brynjar bætir við að endingu:
„Þegar öll þessi upphlaup andstæðinga ríkisstjórnarinnar skila ekki árangri samkvæmt skoðanakönnunum er almenningur fífl og fávitar með Stokkhólmsheilkenni.“