Kathleen Jenkins, ung kona frá Suður Wales sló í gegn á dögunum þegar hún fór í áheyrnarprufu fyrir Britain´s Got Talent. Uppskar hún mikil fagnaðarlæti og standandi lófaklapp, meðal annars frá dómnefndinni, eftir að hún lauk flutningi sínum á Rolling Stones slagaranum Wild Horses.

Hin unga söngkona var heldur óstyrk þegar hún steig á svið fyrir framan dómnefndina. Hún og nýbakaður eiginmaður hennar búa hjá foreldrum hennar á meðan þau reyna að borga niður skuldirnar af brúðkaupinu og vinnur Kathleen við ræstingar. Hún segist þó alltaf hafa átt sér þann draum að syngja á sviði.

Óhætt er að segja að hún hafi hrifið salinn með sér þegar hún hóf upp raustina og ekki stóð á hrósi frá dómnefndinni sem öll stóðu upp og klöppuðu í lokin.

„Þú hefur hæfileika sem er sannskölluð guðsgjöf,“ sagði David Walliams á meðan Amanda Holden sagði að Kathleen væri „það sem þessi þáttur snýst um.“

„Ég hef verið að bíða eftir þér í allan dag. Einhverjum sem er einfaldlega með þetta. Þú ert mjög,mjög sérstök,“ sagði hinn dómharði Simon Cowell að lokum. Það er því nokkuð ljóst að hin upprennandi stjarna mun ekki skúra gólf mikið lengur.

Heillandi flutning hennar má sjá hér fyrir neðan.