Mikill viðsnúningur varð á afkomu WOW á fyrsta fjórðungi þessa árs en hagnaður félagsins nam 400 milljónum króna eftir skatta borið saman við tap upp á 280 milljónir á sama tímabili fyrir ári. Þá jukust tekjur WOW air um 141% á fjórðungnum og voru samtals 4 milljarðar króna.

Þetta kemur fram í tilkynningu frá félaginu en rekstarhagnaður án afskrifta (EBITDA) var 680 milljónir króna á tímabilinu og jókst um milljarð frá því á fyrsta fjórðungi árið 2015.

Þá segir í tilkynningunni að WOW air hafi flogið með 193 þúsund farþega sem er um 119% aukning á milli ára. Sætanýtingin á fyrsta ársfjórðungi er 88% og fjölgaði framboðnum sætiskílómetrum um 164% milli ára sem er mesta aukning frá stofnun félagsins.

„Við erum mjög ánægð með árangur okkar á fyrsta ársfjórðungi enda gríðarleg aukning í bæði sætaframboði og afkomu. Við höfum vaxið hratt og það er ánægjulegt að sjá hversu vel okkur hefur tekist að ná frábærri nýtingu yfir vetrarmánuðina þrátt fyrir meira en tvöföldun á framboði. Persónulega er ég fyrst og fremst þakklátur fyrir hversu góðar móttökur við höfum fengið á Norður-Ameríkuflugi okkar sem og hversu vel WOW teymið hefur haldið utan um þennan mikla vöxt með brosi á vör,“ er haft eftir Skúla Mogensen, forstjóri og stofnanda WOW air, í tilkynningu.