Langþráður dómur Héraðsdóms Reykjaness yfir Margréti Friðriksdóttur hefur nú loks verið kveðinn upp. Margrét var ákærð fyrir ærumeiðingar, ærumeiðandi aðdróttanir og fyrir að hafa haft í frammi ærumeiðandi aðdróttanir gegn betri vitund gagnvart Barböru Björnsdóttur, héraðsdómara hjá Héraðsdómi Reykjavíkur.
Margrét lét ummælin falla á Facebook-síðu sinni í kjölfar þess að Barbara sakfelldi hana í Héraðsdómi Reykjavíkur fyrir hótanir í garð Semu Erlu Serdar. Þeim dómi var síðan snúið við í Landsrétti og Margrét sýknuð.
Í Facebook-ummælunum kallaði Margrét Barböru meðal annars „lausláta mellu“ en hún fullyrðir að Barbara hafi staðið í framhjáhaldi með þáverandi yfirmanni sínum, Símoni Sigvaldasyni. Framhjáhaldið hafi meðal annars verið stundað í húsakynnum Héraðsdóms Reykjavíkur.
Barbara neitaði framhjáhaldinu í aðalmeðferð málsins yfir Margréti og Símon neitaði að svara spurningum um aðrar konur en eiginkonu sína. Barbara sagði sögusagnirnar eiga upptök í nafnlausu bréfi sem kollegi hennar, Sigríður Hjaltested, hefði skrifað til Dómstólasýslunnar.
Aðalmeðferð málsins gegn Margréti var 16. janúar. Ekki náðist að kveða upp dóm í málinu innan tilskilinna fjögurra vikna vegna veikinda dómarans, Jónasar Jóhannssonar, og krafðist Margrét þess þá að málið yrði endurflutt. Við því varð dómarinn en hafnaði kröfu Margrétar um að leiða fram ný vitni. Þessar vendingar tóku sinn tíma og því er loks núna komið að uppkvaðningu dómsins, tæplega hálfu ári eftir aðalmeðferð.
Niðurstaðan var sú að Margrét var sakfelld samkvæmt ákæru. Var hún dæmd til að greiða 200 þúsund króna sekt. 14 daga fangelsi kemur til ef sektin er ekki greidd innan fjögurra vikna. Ekki var krafist ómerkingar ummælanna.
Margrét var ekki viðstödd dómsuppkvaðninguna.
Nánar verður fjallað um dóminn síðar.
