Brotist var inn í pizzustaðinn Glóstein í Árbænum í gærkvöldi. Eins og sést í myndbandi frá öryggismyndavél braut þjófurinn rúðu og tæmdi svo peningakassann. Eigandi segir lögregluna hafa tekið á málinu af festu og vonar að þjófurinn verði handsamaður.
„Það kom þarna maður og braut rúðu. Hann tók þarna stærstu rúðuna og fór þar í gegn,“ segir eigandinn Blenda, Berglind Björk Þórhallsdóttir. En Glósteinn er við Nethyl 2 gegnt Árbæjarsafni.
Innbrotið átti sér stað rétt fyrir miðnætti í gærkvöldi. Eins og sést á myndbandinu tók inn óprúttni stóran steindrumb sem liggur fyrir utan veitingastaðinn, og er yfirleitt notaður til að halda hurðinni, og kastaði honum í gegnum rúðuna.
Því næst prílaði hann í gegnum rúðuna og fór rakleiðis að peningakassanum, opnaði hann og tæmdi af seðlum.
„Við fáum þetta náttúrulega aldrei til baka en það er náttúrlega gott að ná svona fólki,“ segir Berglind. Vita þau ekki til þess að maðurinn hafi verið að vinna með neinum öðrum. Aðeins hann sjáist á myndbandinu, sem staðurinn birti á Facebook-síðunni í dag.
Fyrir utan peningana sem þjófurinn náði og hina brotnu rúðu þá olli drumburinn sjálfur einnig tjóni. Það er að það sést aðeins á bæði gólfinu og innréttingu sem hann rann á.
Berglind segist vera ánægð með viðbrögð lögreglunnar í málinu. Eigendurnir hafi áður lent í innbroti og þá hafi ekki verið tekið á málinu af jafn mikilli festu og nú.
„Við lentum í því fyrir ári síðan að það var brotist inn. Þá var komið, gerð lögregluskýrsla og svo farið. En í gær var rannsóknarlögreglan kölluð til og staðurinn virkilega rannsakaður. Þeir báðu okkur um vídjó og svo framvegis,“ segir hún.
Í færslunni spurðu eigendurnir hvort að fólk kannaðist við manninn. Ef svo mætti senda upplýsingar á glosteinn@glosteinn.is
