Ungur maður hefur verið dæmdur í skilorðsbundið fangelsi fyrir að skalla annan fyrir utan félagsheimili á Patreksfirði. Fékk hinn slasaði áverka á nefi og vör.
Dómurinn féll í Héraðsdómi Vestfjarða í dag, 15. maí. Var maðurinn, sem er á 23. ári, dæmdur til 30 daga fangelsis, en skilorðsbundið til tveggja ára.
Atvikið átti sér stað fyrir utan félagsheimilið á Patreksfirði aðfaranótt 30. maí árið 2025. En þar var ball með Begga í Sóldögg í tilefni sjómannadagsins.
Réðist hinn ungi maður á annan og skallaði í andlitið eins og segir í dóminum. Hlaut brotaþoli eymsli og væg bólgumerki við nefrót, báðu megin nasar, blæddi úr og hlaut bólgu og sár í efri vör og nokkuð mar í munnslímhúð á innanverðri efri vör.
Játaði maðurinn brot sitt skýlaust og var málið því tekið til dóms án frekari sönnunarfærslu. Var litið til játningar við ákvörðunar refsingar sem og ungs aldurs hans.
„Hins vegar verður ekki litið fram hjá því að ákærði réðist fyrirvaralaust og að tilefnislausu á brotaþola og beindist árásin að höfði brotaþola,“ segir í dóminum.
Varð brotaþoli ekki fyrir varanlegum afleiðingum vegna árásarinnar en hún var engu að síður hættuleg.
Auk fangelsisrefsingar var hinn ungi maður dæmdur til að greiða brotaþola 150 þúsund krónur í bætur ásamt vöxtum og 200 þúsund krónur í málskostnað. Þá þarf hann einnig að greiða rúmlega 260 þúsund krónur í annan sakarkostnað, sem samanstendur að mestu að þóknun skipaðs verjanda síns.
