Tveir erlendir menn hafa verið dæmdir í fangelsi fyrir líkamsárás gagnvart hvorum öðrum á sama tíma. Annar fékk þó tvöfalt lengri dóm en hinn.
Atvikið átti sér stað að kvöldi 22. nóvember árið 2022 í leiguherbergi annars mannsins í Reykjanesbæ. Lögreglu barst tilkynning frá konu, öryggisverði á staðnum, um klukkan 22 um að tveir menn hefðu verið að slást en búið væri að skilja þá í sundur.
Þegar konan kom að mönnunum sögðust þeir ekki hafa verið að slást heldur sögðust þeir báðir hafa dottið. En þegar lögregla spurði mennina kom í ljós að svo var ekki heldur hafði komið til alvarlegra slagsmála á milli þeirra. Hvorugur þeirra er nafngreindur í dóminum, heldur sem Y og X.
Annar þeirra, Y, sagði að X hafi verið ósáttur við að Y hafi fengið epli frá Útlendingastofnun en ekki hann sjálfur. Hafi gremjan orðið svo mikil að X hafi ráðist á Y og þeir svo skipst á hnefahöggum.
X sagði við lögreglu að hann og Y hafi byrjað að rífast en rifrildið hafi svo leiðst út í slagsmál. Sagðist hann ekki vilja segja hvor þeirra hafi átt upptökin að þessari glímu. Þeir hefðu þekkst í heimalandinu og líkaði þá illa hvorum við annan.
Það sá á báðum mönnunum og þurfti að flytja Y á sjúkrahús með sjúkrabifreið. Kom í ljós að hann var kjálkabrotinn á þremur stöðum og þurfti hann að gangast undir aðgerð. Seinna fékk hann svo sýkingu í kjálkann. Þann 5. desember þetta ár leitaði hann á lögreglustöð og lagði fram kæru.
X þurfti líka að leita á bráðamóttöku og fór þangað í fylgd lögreglu. Var hann með skurð fyrir ofan vinstri augnbrún sem þurfti að sauma, sprungu á neðri vör og skrámur og mar á andliti. Löngu seinna, eða þann 24. apríl árið 2024, leitaði X svo á lögreglustöð og kærði Y fyrir líkamsárás.
Fyrir dómi lýsti Y atburðarásinni svo að hann hefði verið á krá í Reykjavík og fengið sér nokkra bjóra. Svo fór hann heim til Keflavíkur og hitti vini sína í leiguherbergi sínu. Einn þeirra hefði boðið honum inn á herbergi til að fá epli en þar hefði fyrir verið X. X hafi setið í rúmi og öskrað mjög hátt þegar hann hafi séð Y og viljað hann burt.
X hefði svo staðið upp og ógnað honum. Eftir það hafi atburðarásin verið mjög hröð.
„Við fórum að slást, ég sló hann tvisvar, hann fór í gólfið,“ sagði Y. Höggin hafi gengið á milli þeirra uns X hafi sagst ekki vlja slást lengur. Þá hafi þeir farið inn á baðherbergi, þrifið sig og verið sáttir. Þá hafi öryggisvörðurinn komið og spurt hvað hafði gerst.
Ástæðan fyrir því að þeim væri ekki vel við hvorn annan væri sú að X hefði talað illa um Úkraínu í matarboði. Eftir það hafi vinirnir hætt að bjóða honum í mat og hætt að tala við hann.
X sagðist hafa verið á herbergi sínu að lesa þegar Y hafi komið ásamt félaga sínum, hafi verið mjög árásargjarn, hávær og verið af honum áfengislykt. „Ég vildi ekki hafa læti í herberginu,“ sagði X. Y hafi ekki viljað fara út úr herberginu.
Þeir hafi farið að rífast og hafi Y slegið hann þrisvar sinnum. Hafi hann lent á vegg og þá tekið Y föstum tökum svo hann gæti ekki lamið hann áfram. Þeir hefðu svo farið í sitt hvora áttina og X farið að þrífa blóðið af sér. En svo lent aftur saman. Hann neitaði því ekki að hafa slegið Y en það hafi verið í sjálfsvörn.
Dómari ákvað að báðir bæru sök í málinu. X fékk tveggja mánaða fangelsisdóm en Y eins mánaða. Báðir eru dómarnir hins vegar skilorðsbundnir til tveggja ára.
X var gert að greiða Y 900 þúsund krónur í miskabætur auk rúmlega 350 þúsund krónur í málskostnað sem og rúmlega 1 milljón í málsvarnarlaun lögmanns síns.
Y var gert að greiða X 300 þúsund krónur, rúmlega 350 þúsund krónur í málskostnað og rúmlega 1 milljón í málsvarnarlaun lögmanns síns.
