Nýtt framboð, Betri sveit – fyrir okkur öll, býður fram lista í komandi sveitarstjórnarkosningum í Grímsnes- og Grafningshreppi. Greint er frá þessu á vef Dagskrárinnar.
Betri sveit hefur það að markmiði að stjórnsýsla sveitarfélagsins verið opnari, stuðlað verði að sanngjörnum ákvörðunum sem byggja ætíð á hagsmunum samfélagsins í heild. Framboðið leggur áherslu á skýrt utanumhald um framvindu verkefna og þeirra málefna sem sveitarfélagið stendur að eða stendur frammi fyrir.
Einnig segir að framboðið vilji auka samráð og að vilji íbúa sé kannaður með ráðgefandi íbúakosningu. Skal markmiðið ætíð vera að efla með markvissum hætti lýðræðisleg vinnubrögð í sveitarfélaginu, verja fé til framkvæmda eftir forgangsröðun íbúanna sjálfra og með hagsmuni heildarinnar að leiðarljósi.
Betri sveit vill móta framtíðarsýn fyrir sveitarfélagið sem verði leiðarljós að ákvarðanatöku kjörinna fulltrúa.
Andrés Bertelsen hefur verið kosinn oddviti listans. Aðrir frambjóðendur verða kynntir á næstu vikum ásamt helstu stefnumálum framboðsins. Andrés Bertelsen er fæddur og uppalinn á Silfrastöðum í Skagafirði. Hann útskrifaðist með skipstjórnargráðu frá Tækniskólanum árið 2014. Starfsferill Andrésar spannar alþjóðlega markaðssetningu, fjölmiðlun og hönnun flókinna tæknikerfa. Hann býr að reynslu úr nýsköpunarfyrirtækjum, sem og rótgrónum fyrirtækjum. Andrés starfar nú við hugbúnaðarþróun í alþjóðlegu nýsköpunarverkefni.
Andrés býr ásamt sambýliskonu sinni í Grímsnes- og Grafningshreppi. Tvö eldri börn þeirra eru uppkomin en tvö þau yngri stunda nám við Kerhólsskóla.
Sjá einnig Facebook-síðu framboðsins, hér.
