Vinicius Junior, kantmaður Real Madrid, var meðal gesta á glæsilegum viðburði í París á dögunum þar sem stórstjörnur úr ólíkum heimum komu saman. Viðburðurinn var skipulagður af Nike í tilefni opnunar á nýrri „pop-up“ verslun fyrir Skims sem Kim Kardashian á.

Vinícius, 25 ára, hefur verið samningsbundinn Nike frá unglingsaldri og er sagður þéna um sjö milljónir punda á ári samkvæmt samstarfi sínu við íþróttavörurisann. Hann mætti í leðurjakka og víðum buxum og vakti athygli ljósmyndara.

Meðal annarra gesta voru Kim Kardashian og rapparinn Central Cee. Kardashian var áberandi í kynningarefni frá kvöldinu og klæddist bleikum kjól.

Ferðin til Parísar markar endurkomu Kardashian til borgarinnar, hún var dagana á undan í London að hitta nýjasta kærasta sinn, Lewis Hamilton.

Þó viðburðurinn tengdist tísku og markaðsmálum sýnir hann hversu stórt nafn Vinícius er orðið utan knattspyrnunnar.