Louise Haigh, fyrrverandi samgönguráðherra Bretlands, segir það óforsvaranlegt að nota samfélagsmiðilinn X. Hún hvetur ríkistjórnina til að hætta að nota miðilinn tafarlaust. Ástæðan er gervigreindin Grok og hvernig hægt hefur verið að nota hana til þess að búa til barnaklám.
Mikið hefur verið fjallað um Grok og kynferðislegar gervigreindarmyndir sem hægt er að búa til, meðal annars af börnum. Á meðal þolenda Grok er Katrín prinsessa og barnung leikkona úr Stranger Things.
„Ríkisstjórnin ætti að hætta alfarið á X og láta almenning vita hvernig hægt er að vera varinn fyrir svona ólöglegu athæfi á netinu,“ sagði Haigh. En X og Grok er bæði í eigu milljarðamæringsins og öfgahægrimannsins Elon Musk.
Keir Starmer, forsætisráðherra, hefur þegar hótað að setja þvinganir eða banna X ef miðillinn bæti ekki ráð sitt.
Netöryggissamtökin IWF hafa greint frá því að Grok hafi verið notað til þess að búa til barnaklám af börnum allt niður í 11 ára. Efninu hefur svo verið dreift á hinum svokallaða myrkravef.
„Ég hef ekki notað X/Twitter í þónokkurn tíma núna. Þetta var þegar frekar ógeðfelldur staður áður en að Elon Musk tók hann yfir en síðan þá hefur þetta verið griðastaður fyrir þá sem beita hatursorðræðu og stafrænu ofbeldi, þetta er algjörlega ónothæfur miðill,“ sagði Haigh.
