Leiksýningin Galdrakarlinn í Oz verður frumsýnd á Stóra sviði Borgarleikhússins þann 24. janúar næstkomandi. Af því tilefni ætlar leikstjóri verksins Þórunn Arna Kristjánsdóttir að mæta í Leikhúskaffi á Borgarbókasafninu Kringlunni fimmtudaginn 8. janúar kl. 17:30 og segja frá sýningunni.
Viðstöddum gefst svo í kjölfarið kostur á að fara saman yfir á Stóra svið Borgarleikhússins þar sem hin ævintýralega leikmynd sýningarinnar verður skoðuð og boðið upp á umræður og spurningar fyrir áhugasama.
Einstakt tækifæri fyrir börn og fullorðna til að spóka sig um í ævintýraheimi Oz og öðlast dýrmæta innsýn í verkið.
Um sýninguna
Ungir sem aldnir hafa í áratugi heillast af sögunni um stúlkuna Dóróteu sem ásamt hundinum Tótó lendir óvænt í ævintýralandinu Oz þar sem fuglahræður tala, apar fljúga og galdranornir ráða ríkjum. Til að komast aftur heim þarf Dórótea að fylgja gula veginum sem liggur til galdrakarlsins fræga í Oz en hann er sá eini sem getur hjálpað henni. Leiðin til Oz reynist vera þyrnum stráð og hætturnar leynast víða en sem betur fer eignast Dórótea óvænta vini á leiðinni.
Sagan byggir á samnefndri bók Frank Baums sem öðlaðist nýtt líf með frægri kvikmynd frá 1939 þar sem Judy Garland fór með hlutverk Dóróteu. Síðan þá hafa óteljandi útgáfur litið dagsins ljós, bæði á sviði og á hvíta tjaldinu og ekkert lát virðist vera á vinsældum söngleiksins. Þar spillir ekki fyrir tónlistin með ógleymanlegum lögum á borð við Somewhere Over the Rainbow og We’re off to See the Wizard.
