Katina, einn af frægustu háhyrningum heims, er dáin 50 ára að aldri. Hún þótti vera mikill persónuleiki og var þekkt fyrir að ulla á áhorfendur í sædýragörðum.

Talið er að Katina hafi verið fædd árið 1975. Hún var veidd við Íslandsstrendur sem ungur kálfur og seld til sædýragarðsins Marineland í Kanada. Þaðan var hún keypt til SeaWorld í Bandaríkjunum og flutt í garð þeirra í San Diego árið 1982, síðan til Ohio og loks til Orlando árið 1984 þar sem hún var til dauðadags þann 20. desember á þessu ári.

Katina var næstelsti háhyrningur heims í haldi manna en engu að síður lést hún langt fyrir aldur fram, aðeins fimmtug að aldri. Talið er að háhyrningar geti orðið 80 eða 90 ára gamlir í náttúrunni.

Dýraverndunarsamtök telja að ástæðan fyrir því að háhyrningar lifa svo stutt í haldi manna sé að þeir syndi mun styttri vegalengdir. Þeir fái ekki þá hreyfingu sem þeir þurfa til að lifa eðlilegu lífi.

SeaWorld harmar fráfall Katinu sem var einn vinsælasti háhyrningur garðsins. Hún hafi verið mikill persónuleiki og var þekkt fyrir að ulla á áhorfendur.

„Í mörg dásamleg ár heillaði Katina milljónir gesta og hvatti þá til að læra meira um þessa ótrúlegu tegund,“ segir í tilkynningu garðsins.

Katina átti fjölda afkvæma, meðal annars með einum þekktasta háhyrning heims, dráparanum Tilikum.