Lögreglan á höfuðborgarsvæðinu óskar eftir myndefni sem kann að vera vistað í bílum, í þágu rannsóknar á mannsláti á Kársnesi sunnudaginn 30. nóvember. 29 ára gamall grískur maður situr í gæsluvarðhaldi vegna rannsóknar málsins en hinn látni var fertugur Portúgali. Hann lést á heimili sínu en mennirnir tveir þekktust. Stunguáverkar voru á líki hins látna.

Lögreglan hefur sent frá sér eftirfarandi tilkynningu vegna málsins:

„Í þágu rannsóknar Lögreglunnar á höfuðborgarsvæðinu á andláti karlsmanns í heimahúsi í Kópavogi í lok nóvember leitar embættið eftir myndefni frá vegfarendum sem fóru um bifreiðastæði við Kópavogslaug og göturnar Skjólbraut, Borgarholtsbraut, Meðalbraut og Kópavogsbraut föstudaginn 28. nóvember frá kl. 18 og til miðnættis. Mörg ökutæki eru búin myndavélum og því viðbúið að myndefni frá áðurnefndum tíma sé að finna í fórum einhverra. Einnig er biðlað til forsvarsmanna öryggismyndavéla sem kunna að vera á umræddu svæði að athuga með myndefni vegna málsins.

Hinir sömu eru vinsamlegast beðnir um að senda upplýsingar um slíkt á netfangið r2a@lrh.is og gefa þar upp bæði nafn sitt og símanúmer. Í framhaldinu verður haft samband við viðkomandi. Upplýsingum má einnig koma á framfæri í síma 444 1000.“