Taílenskir fjölmiðlar greina frá því að slagsmál hafi brotist út á milli nokkurra  vespuökumanna í borginni Pattaya síðastliðið laugardagskvöld. Er fullyrt í þarlendum fjölmiðli að tveir Íslendingar hafi átt hlut að máli. Rétt er þó að geta þess að taílenskir miðlar rugla nokkuð reglulega saman Íslendingum og Írum í fréttum sínum.

Í frétt Pattaya Mail segir að átök hafi brotist út á milli annars vegar tveggja Íslendinga og hins vegar manns af arabískum uppruna. Aðdragandinn var sá að tvær vespur rákust saman og upp úr því gaus mikið rifrildi og handalögmál þar sem menn létu hnefahögg og spörk dynja hver á öðrum. Sjónarvottar reyndu að ganga á milli mannanna og stöðva átökin. Lögregla kom síðan fljótt á vettvang og skakkaði leikinn. Voru allir þátttakendur í slagsmálunum handteknir.

Í átökunum varð ófrísk kona fyrir slysashöggi og var flutt á sjúkrahús eftir að vegfarendur höfðu hlúð að henni.

Í frétt The Pattaya News um málið er birt meðfylgjandi myndband af átökunum. Þar segir hins vegar að tvímenningarnir sem nefndir eru til sögunnar séu annaðhvort Íslendingar eða Írar, en heimildum beri ekki saman um það. Miðað við það er mögulegt að þarna hafi ekki verið Íslendingar í átökum, heldur Írar.

Fréttin hefur verið uppfærð