Inga Sæland, formaður Flokks fólksins, segir að það muni koma í ljós hvort Guðmundur Ingi Kristinsson, mennta- og barnamálaráðherra, snúi aftur í ráðuneyti sitt.

Inga sagði þetta í Silfrinu í gærkvöldi en fjallað er um málið á vef RÚV.

Greint var frá því fyrr í mánuðinum að Guðmundur Ingi væri kominn í veikindaleyfi og Eyjólfur Ármannsson innviðaráðherra hefði tímabundið tekið við verkefnum hans.

Guðmundur Ingi mun gangast undir hjartaaðgerð í byrjun nýs árs, en í tilkynningu á vef Stjórnarráðsins þann 9. Desember síðastliðinn kom fram að gert væri ráð fyrir að hann myndi snúa aftur til starfa eftir aðgerðina.

Inga segir að það muni hins vegar koma í ljós hvað gerist, enda stór aðgerð fram undan.

„Hann er að fara í opna hjartaskurðaðgerð, og þarf að skipta um hjartaloku eða eitthvað slíkt sem ég kann ekki alveg frá að segja, en ég vil bara sjá til hvernig framvindan verður. Það veit enginn hvernig það fer, einstaklingar þurfa að fara í endurhæfingu, mislanga, og annað slíkt eftir slíka aðgerð. Við óskum Guðmundi alls hins besta og bíðum eftir því að hann verði sprækur sem lækur,“ sagði Inga Sæland í Silfrinu að því er fram kemur á vef RÚV.