Nýjasta sjónvarpsauglýsing Bónus fór í loftið síðasta föstudag og hefur vakið mikla athygli meðal landsmanna. Það er þá einna helst unga og upprennandi leikkonan Lovísa Ösp Ögmundsdóttir sem stelur senunni með hispurslausri framkomu og einstökum leikhæfileikum.

Sjá einnig: Lítt þekkt ættartengsl: Bráðskemmtilega Bónusstúlkan

Lovísa fer með stórleik í auglýsingunni þar sem hún bregður sér í hlutverk bókarans og boðar foreldra sína á mikilvægan fjölskyldufund inni í herberginu sínu. Á fundinum tuskar hún foreldra sína til og brýnir fyrir þeim að þau séu búin að vera að eyða allt of miklu án þess að gera sér grein fyrir því og að eina ráðið til að bjarga ástandinu á heimilinu og spara fyrir hennar framtíð sé að versla í Bónus.

„Ég er alltaf að hvetja ömmu mína og afa að versla í Bónus og spara pening,“ segir Lovísa í viðtali á bak við tjöldin og óhætt er að segja að í auglýsingunni hafi hún náð að sannfæra fleiri um það.

Lovísa æfir fimleika en hefur alltaf haft gaman af leiklist. Nýlega steig hún á svið í jólapartýsýningu Skoppu og Skrítlu sem var frumsýnd í Borgarleikhúsinu í nóvember. Það verður spennandi að sjá hvaða hlutverk hún bregður sér í næst.