Ástæðan fyrir því að 29 ára gamall grískur maður var aftur handtekinn og úrskurðaður gæsluvarðhald eftir að hafa verið látinn laus, í tengslum við rannsókn á mannsláti á Kársnesi í Kópavogi, var sú að önnur lífsýni en úr hinum látna fundust á hníf sem talið er að hinn látni hafi verið stunginn með.

Þetta kemur fram í frétt RÚV um málið.

Hið ókunna lífsýni á hnífnum var sent með hraðsendingu til Svíþjóðar til frekari rannsókna og þegar þær niðurstöður liggja fyrir verður tekin ákvörðun um næstu skref í rannsókninni.

Gríski maðurinn neitar sök í málinu og hefur kært gæsluvarðhaldsúrskurðinn til Landsréttar.

Brotaþolinn fannst látinn íbúð sinni sunnudaginn 30. nóvember. Samkvæmt heimildum RÚV fór nákominn aðili að undrast um hann eftir að hafa ekki náð sambandi við hann í einn og hálfan sólarhring. Hinn látni var með nokkra stunguáverka og í fyrstu taldi lögregla líklegt að hann hefði veitt sér áverkana sjálfur.

Nokkrum dögum síðar var gríski maðurinn hins vegar handtekinn.