Ársæll Guðmundsson, skólameistari Borgarholtsskóla, hefur verið á margra vörum í kjölfar þeirra ákvörðunar menntamálaráðherra, Guðmundar Inga Kristinssonar, að endurskipa henn ekki í embætti næsta haust heldur auglýsa stöðuna. Ársæll hefur verið í embætti í tíu ár en skipað er til fimm ára í senn. Ársæll benti á að hann ætti flekklausan feril að baki og staðhæfði að ákvörðunin væri runnin undan rifjum Ingu Sæland ráðherra í tengslum við skóparsmálið fræga en Inga hringdi sem frægt varð í Ársæl vegna glataðs skópars barnabarns hennar og hefur Ársæll farið hörðum orðum um símtalið.
DV hefur ekki gögn og upplýsingar til að meta stuðning við Ársæl innan Borgarholtsskóla en ljóst er þó að hann er umdeildur. Hafa nokkrir núverandi og fyrrverandi kennarar við skólann komið að máli við DV og lýst yfir mikilli óánægju með stjórnunarhætti hans og segja þá einkennast af yfirgangi og sjálfsdýrkun.
Á starfsmannafundi í skólanum síðasta mánudag var ekki lögð fram stuðningsyfirlýsing við Ársæl þó að tveir kennarar í hópnum sæktust eftir því.
Einn hinn óánægðu kennara er Bryndís Valberg, sem er í veikindaleyfi vegna krabbameinsmeðferðar. Bryndís er jafnframt fyrrverandi formaður kennarafélags Borgarholtsskóla. Bryndís kærði Ársæl til Menntamálaráðuneytisins fyrir einelti en ráðuneytið úrskurðaði að um skoðanaágreining hefði verið að ræða. Hefur Bryndís áfrýjað þeirri ákvörðun til Umboðsmanns Alþingis.
Bryndís hefir einnig kært til Persónuverndar meðferð á persónuupplýsingum sínum í tengslum við, að hennar sögn, tilhæfulausa kvörtun nemanda gagnvart henni sem hún segir hafa verið nafnlausan rógburð.
Ljóst er að eitthvað hefur gengið á í skólanum í gegnum embættisferil Ársæls ef sambandið milli hans og formmanns kennarafélags skólans hefur verið með þessum hætti.
Bryndís segir í samtali við DV að gagnrýni sem tveir kennarar viðruðu í tveggja kvenna tali sínu í heitum potti í Grafarvogslaug hafi leitt til þess að báðar voru teknar á teppið hjá Ársæli og önnur hrökklaðist úr starfi. Eiginkona Ársæls var stödd í heita pottinum og hlýddi á tal kennaranna.
„Hann frétti af þessum samræðum vegna þess að eiginkona hans var í þessum heita potti og hlustaði á samræðurnar. Ársæll kallað annan kennarann til sín á teppið, því eiginkonan vissi nafnið hennar. Ársæll linnti ekki látum fyrr en hún gaf upp nafnið á hinum kennaranum. Sá kennari hrökklaðist úr stöðunni sinni nokkrum dögum síðar vegna þess að hún svaraði fyrir sig. Henni var gert að segja upp á miðri önn. Hún er nú kennari í öðrum framhaldsskóla og er ekki sátt við Ársæl. Svona er egóið hans yfirþyrmandi,“ segir Bryndís.
DV bar þessa frásögn undir Ársæl með skriflegri fyrirspurn. Fyrirspurninni var ekki svarað fyrir birtingu fréttarinnar.
