Einn af þekktustu lögmönnum landsins Ragnar Halldór Hall hefur lagt inn málflutningsréttindi sín og virðist því hættur í lögmennsku eftir langan feril. Sýslumaðurinn á Norðurlandi eystra sendi frá sér tilkynningu þessa efnis, 8. desember síðastliðinn, og er hún birt í Lögbirtingablaðinu í dag en Ragnar varð einmitt 77 ára 8.desember.

Ragnar hefur komið í störfum sínum að mörgum umfangsmiklum og þekktum málum, síðustu áratugi. Þar má nefna t.d. Hafskipsmálið á níunda áratug síðustu aldar þegar samnefnt skipafélag varð gjaldþrota og forsvarsmenn þess dregnir fyrir dóm en að því máli kom hann þó ekki sem lögmaður heldur sem skiptaráðandi en hann sneri sér ekki að lögmennsku fyrr en síðar.

Einnig kom hann að Baugsmálinu en í því máli voru forsvarsmenn samnefnds fyrirtækis ákærðir en meðal þeirra sem hlutu dóm í málinu var Jón Ásgeir Jóhannesson. Samkvæmt umfjöllun fjölmiðla á þessum tíma var Ragnar lögmaður fyrirtækisins sjálfs en ekki sakborninga.

Eftir hrunið 2008 var hann meðal verjenda í Al-Thani málinu þar sem forsvarsmenn Kaupþings voru sakfelldir fyrir ýmist markaðsmisnotkun eða umboðssvik. Ragnar mun þó hafa sagt sig frá málinu áður en því lauk.

Öll þessi mál vöktu mikla athygli og var töluvert fjallað um þau í fjölmiðlum en svo virðist sem að aðkoma Ragnars að slíkum málum verði ekki endurtekin.

Fréttin hefur verið uppfærð og leiðrétt en skilja mátti fyrri útgáfu fréttarinnar þannig að Ragnar hafi verið lögmaður í Hafskipsmálinu og þar var ranglega fullyrt að hann hefði verið meðal verjenda sakborninga í Baugsmálinu.