Tuttugu og eins árs gamall háskólanemi, Danilo Kuzmin, var á dögunum myrtur með hrottalegum í hætti í í Vínarborg. Talið er að Kuzmin, sem er sonur Sergey Kuzmin borgarstjóra úkraínsku borgarinnar Kharkiv, hafi orðið fyrir barðinu á samviskulausum ræningjum sem ásældust rafmyntir í eigu Kuzmin-feðganna.

Kuzmin var boðaður á bílaplan lúxushótelsins Sofitel í austurrísku höfuðborginni en þar er talið að ræningjarnir tveir, sem einnig voru frá Úkraínu, hafi ráðist á hann, troðið honum inn í bifreið og pyntað hann hrottalega. Tilgangurinn var sagður sá að reyna að fá Kuzmin yngri til að gefa upp lykilorð að rafmyntareikningum feðganna.

Háskólanemanum var misþyrmt hrottalega í baksæti bílsins allt þar til að ræningjarnir komust yfir lykilorð tveggja reikninga. Þá var keyrt með Kuzmin, sem var illa farinn eftir barsmíðarnar, á annan stað í borginni, svokallað Donaustadt-hverfi, en þar kveiktu ræningjarnir í bifreiðinni með piltinn læstan inni. Lést hann í eldsvoðanum en hann hlaut brunasár á um 80% líkama síns.

Lögregluyfirvöld í Austurríki hefur haft hendur í hári tveggja manna vegna ódæðisins en þeir eru sagðir 45 og 19 ára gamlir. Sá yngri er sagður hafa gengið í sama háskóla og Kuzmin og kynnst honum þar. Talið er að hugmyndin að ráninu hafi kviknað þegar Kuzmin tjáði sig fjálglega um það að hann og faðir hans ættu talsvert af peningum í rafmyntum.