Vilhjálmur Birgisson, formaður SGS og Verkalýðsfélag Akraness, segir að ríkisstjórnin verði að skipta um kúrs til að mæta gífurlegum áföllum og samdrætti í útflutningstekjum þjóðarinnar.
Tilefnið er frétt dagsins, alvarleg bilun í álveri Norðuráls á Grundartanga, sem skerðir afkastagetu álversins um tvo þriðju næstu mánuði, jafnvel í allt að árstíma.
Hins vegar er þetta ekki eina áfallið sem þjóðarbúið er að verða fyrir og segir Vilhjálmur morgunljóst að útflutningstekjur þjóðarinnar dragist saman um tugi milljarða á næstu mánuðum. Segir hann að á sama tíma sé í gangi af hálfu ríkisstjórnarinnar ofurskattlagning á skemmtiferðaskip sem geti valdið minnkandi umsvifum. Einnig nefnir hann lokun PCC á Bakka og samdrátt í framleiðslu járnblendiverksmiðju Elkem.
Hvað er eiginlega að gerast í íslensku samfélagi? spyr Vilhjálmur og skrifar:
„Mikilvægt er að almenningur átti sig á því að það er gjaldeyrisskapandi verðmætasköpun sem heldur öllum tannhjólum samfélagsins gangandi – hún stendur undir velferðinni, þjónustunni, atvinnunni og lífskjörunum. Ef sú framleiðsla hrynur, þá tekur allt hagkerfið hliðarskref.
Stjórnvöld og þingheimur verða að átta sig á mikilvægi þess að skapa fyrirtækjum samkeppnishæf rekstrarskilyrði. Ef það gerist ekki, þá er morgunljóst að illa getur farið fyrir gjaldeyrisskapandi atvinnugreinum landsins – atvinnugreinum sem eru grunnstoðir íslensks efnahagslífs.
Það er kominn tími til að þingheimur allur girði sig í brók og átti sig á þeirri alvarlegu stöðu sem farin er að teiknast upp í íslensku efnahagslífi. Við þurfum á ábyrgum ákvörðunum að halda – ekki frekari óvissu, skattpíningu og skammsýni sem veikja verðmætasköpunina.
Á sama tíma og þetta gerist dregur Seðlabanki Íslands allt súrefni frá heimilum og fyrirtækjum með himinháum stýrivöxtum – eitthvað verður að breytast áður en alvarlegur skaði verður óafturkræfur.“
