Íslenska karlalandsliðið er í 74. sæti á nýjum heimslista FIFA sem gefinn var út í dag.
Liðið stendur í stað frá síðasta lista. Frá því síðasti listi var gefinn út tapaði Ísland fyrir Úkraínu 3-5 en gerði svo glæsilegt 2-2 jafntefli við Frakkland.
Þess má geta að besta staða Strákanna okkar á listanum var 18. sæti árið 2018.
Spánn heldur stöðu sinni á toppi listans, Argentína er í öðru sæti og Frakkar í því þriðja en Argentína og Frakkland áttu sætaskipti á nýútgefnum lista FIFA.
