Manchester United hefur sett saman fjögurra manna lista yfir mögulega eftirmenn Casemiro, sem er á förum frá félaginu í lok tímabilsins. Brasilíski miðjumaðurinn, sem var einn af fyrstu stóru leikmannakaupum Erik ten Hag á Old Trafford, mun yfirgefa félagið þegar samningur hans rennur út.

Forráðamenn United hafa ákveðið að framlengja ekki samning Casemiro, sem er með um 350 þúsund pund í vikulaun. Félagið horfir nú til framtíðar og ætlar að styrkja stöðu varnarsinnaðs miðjumanns.

Samkvæmt enskum blöðum fylgist United grannt með þremur ungum enskum miðjumönnum, Elliot Anderson hjá Nottingham Forest, Adam Wharton hjá Crystal Palace og Alex Scott hjá Bournemouth. Þremenningarnir hafa vakið athygli stjórnenda United með sterkri frammistöðu á yfirstandandi tímabili.

Auk þess er Carlos Baleba, miðjumaður Brighton, áfram á ratsjá félagsins. Kamerúnski leikmaðurinn, sem er 22 ára gamall, var einnig til umræðu hjá United síðasta sumar. Hugsanleg kaup í janúarglugganum voru skoðuð, en talið er ólíklegt að af þeim verði vegna óvissu um stöðu knattspyrnustjóra hjá félaginu.

Manchester United stefnir því á umtalsverðar breytingar á miðjunni fyrir komandi tímabil.