Harry Kane hefur dregið í efa endurkomu í ensku úrvalsdeildina eftir að hafa gefið í skyn að hann sé opinn fyrir því að framlengja dvöl sína hjá Bayern München.

Kane hefur verið í stórkostlegu formi í upphafi tímabilsins og skorað 19 mörk í 11 leikjum fyrir félag og landslið. Þessi frammistaða hefur þegar orðið til þess að Bayern vill festa Englandsfyrirliðann lengur hjá félaginu, þrátt fyrir að núverandi samningur hans gildi út árið 2027.

Framherjinn viðurkennir nú að upprunalega áætlunin hans, um að snúa aftur til Englands á einhverjum tímapunkti, sé ekki lengur eins skýr og þegar hann gekk í raðir þýska stórliðsins sumarið 2023.

Þessi tíðindi eru áfall fyrir Tottenham, þar sem þjálfari þeirra, Thomas Frank, ræddi nýverið opinberlega um þá draumsýn að endurheimta markahæsta leikmann félagsins frá upphafi.

„Ég get alveg séð fyrir mér að vera lengur hér,“ sagði Kane.

„Hvort ég fari aftur í ensku úrvalsdeildina? Ég veit það ekki.“

„Ef þú hefðir spurt mig þegar ég fór fyrst til Bayern, hefði ég sagt að ég kæmi klárlega aftur. En hlutir breytast.“

Kane hefur komið sterkur inn í þýsku deildina og virðist njóta sín bæði innan vallar og utan og nú er alls ekki víst að hann muni snúa heim í bráð.