Þann 9. desember 2021 lét fjölskyldufaðirinn, Tom Phillips, sig hverfa ásamt börnum sínum þremur frá heimili þeirra í bænum Marokopa á Norðureyju Nýja-Sjálands. Ástæðan var sú að hann var að missa forsjá yfir börnum sínum og greip hann því til þessa örþrifaráðs.

Enginn hefði getað gert sér í hugarlund að nú tæpum fjórum árum síðar hefur enn ekkert spurst til Phillips og barnanna annað en einstakar myndir sem taldar eru vera af þeim.

Talið er að Tom hafi dvalið allan þennan tíma í óbyggðum Nýja-Sjálands ásamt börnunum  Jaydu, sem nú er 12 ára, Maverick, 10 ára, og Ember, 9 ára. Þrátt fyrir víðtæka leit hefur lögreglu ekki tekist að hafa hendur í hári þeirra og umtalsverð fundarlaun, um 6 milljónir íslenskra króna, fyrir upplýsingar um þau hafa litlu skilað hingað til þó að tilkynningum um ferðir fjórmenninganna fari fjölgandi.

Í febrúar sást til fjögurra einstaklinga í felubúnaði við fjölfarinn þjóðveg og síðasta haust sögðust villisvínaveiðimenn hafa séð Phillips og börnin ganga í einni röð yfir beitiland.

„Sorglegt að þú hafir talið þig þurfa að gera þetta“

Fjölskylda Tom hefur verið þögul sem gröfin um flótta hans en í vikunni breyttist það þegar móðir hans, Julia, steig fram í vinsælum fréttaskýringaþætti og birti skriflegt ákall til sonar síns.

„Tom – mér finnst sorglegt að þú hafir talið þig þurfa að gera þetta,“ skrifar Julia. „Þú hugsaðir ekki út í það hve mikið við elskum þig og getum stutt þig. Það særir í hvert sinn sem ég sé myndir af börnunum og af þér, og hugsa um það sem hefði getað orðið ef þú hefðir ekki horfið. Jayda, Maverick, Ember – ég elska ykkur og sakna ykkar á hverjum degi.“

Rozzi, systir Phillips, sendi sömuleiðis frá sér ákall til bróður síns.

„„Kannski sér hann þetta og áttar sig á því að hann getur komið heim, að við erum hér fyrir hann. Hann gengur að mikilli ást og stuðningi og við erum tilbúin að hjálpa honum að ganga í gegnum það sem þarf,“ sagði hún.

Rozzi sagðist telja að bróðir hennar hugsaði vel um börnin, enda væri hann öllu vanur úti í náttúrunni. Phillips er sagður reyndur útivistarmaður sem fór reglulega með börn sín í útilegur og veiðiferðir.

Hann hafði hins vegar iðulega komist í kast við lögin á árunum fyrir flóttann, til að mynda vegna líkamsárása og innbrots, sem stuðlaði meðal annars að því að hann missti forræðið yfir börnum sínum.