Ingibjörg Isaksen, formaður þingflokks Framsóknar, furðar sig á því að fyrirhuguð heimsókn forseta framkvæmdastjórnar Evrópusambandsins hafi verið sett í uppnám út af eldgosinu sem hófst í nótt. Sérstaklega í ljósi tilgangs heimsóknarinnar.

Ingibjörg skrifar á Facebook:

„Ok, pínu fyndið þegar von der Leyen ætlar að koma til Íslands og kynna sér starfsemi almannavarna og áfallaþol á Íslandi en heimsóknin er í hættu því það er eldgos í gangi. Einhver hefði talið þetta einmitt tímann til að koma í slíkum tilgangi. Eða var þetta kannski dulbúinn undirbúningur fyrir mögulega inngöngu Íslands í ESB?“

Vísir greindi frá því fyrr í dag að það væri til skoðunar hvort eldgosið hefði áhrif á heimsókn von der Leyen, en von var á henni til landsins nú í kvöld. Reyndar kom fram í fréttinni að ekkert benti til þess að heimsókninni yrði aflýst eða frestað heldur væri til skoðunar hvort það yrði eitthvað rask varðandi Grindavíkurheimsókn forsetans.

Ursula von der Leyen mun dvelja hér fram á föstudag og í heimsókninni mun hún meðal annars funda með Kristrúnu Frostadóttur forsætisráðherra og Þorgerði Katrínu Gunnarsdóttur utanríkisráðherra. Tilgangur heimsóknarinnar er að ræða stöðu alþjóðamála, öryggis- og varnarmála, viðskiptamála, almannavarna og loftlagsmála. Ráðherrar munu funda með von der Leyen á öryggissvæði á Keflavíkurflugvelli og svo stóð til að haldið yrði til Grindavíkur að skoða varnargarðana í Svartsengi.