Sú ákvörðun Hildar Sverrisdóttur, þingflokksformanns Sjálfstæðisflokksins og einn af varaforsetum Alþingis, að fresta fundi Alþingis rétt fyrir miðnætti á miðvikudagskvöldið, án umboðs frá foresta Alþingis kveikti mikla úlfúð hjá stjórnarliðum. Mikið uppnám skapaðist við upphaf þingfundar í gær en þar voru þung orð látin falla, til að mynda var Hildur sökuð um tilraun til valdaráns.
Hildi barst hins vegar hjálp úr óvæntri átt þegar Össur Skarphéðinsson, fyrrum ráðherra, steig fram fyrir skjöldu í pistli á Facebook seint í gærkvöldi og kom henni til varnar. Sagði hann uppnámið sýna glöggt að taugakerfi þingmanna væri þanið til hins ítrasta.
„Fráleitt er að kalla það valdarán einsog trekktur ráðherra gerði – eða frá hverjum var völdum rænt? Hafi hún frestað fundi í andstöðu við kláran vilja forseta þingsins er það vissulega uppreisn gegn honum, og brot á óskrifuðum vinnureglum. Um leið hefði orðið trúnaðarbrestur milli hennar og meirihluta þingsins, sem meirihlutinn hefur vald til að jafna næst þegar forsætisnefnd þings er kjörin – með því að setja hana hreinlega út. En ekkert hefur komið fram um að forseti þingsins hafi lagt fyrir hana að halda fundi áfram fram yfir miðnætti. Þannig að ég get ekki áfellst hana, þó meirihlutinn telji sér storkað með því að úrvinda þingforseti vilji komast heim til að sofa,“ skrifar Össur.
Segir hann að vilji ráðherra, jafnvel forsætisráðherra, skipti þá engu máli. Alþingi sé fullvalda og taki ekki við neinum fyrirskipunum handahafa framkvæmdavalds.
„Hafi forseti ekki lagt fyrir hana skýr fyrirmæli er morgunljóst að Hildur hefur ekki brotið neinar reglur, og enn fráleitara að halda því fram að hún hafi brotið stjórnarskrá. En ég hef hvergi séð að hún hafi brotið gegn fyrirmælum forseta þingsins. Allir þurfa að standa vaktina sína, líka aðalforseti,“ skrifaði Össur.
Haukur Arnþórsson, stjórnsýslufræðingur, fjallaði um málið í gær og sagði meðal annars að stjórnarandstaðan væri að ræna völdum af ríkisstjórninni með málþófi sínu. Össur segir í færslu sinni að hann sé efins um þá túlkun og hún eigi sérstaklega ekki við í þessu máli.
„Sú skoðun mín byggir á því að ríkisstjórnin, og meirihluti hennar á Alþingi hefur í þingskaparlögum tæki til að skera á hnútinn ef henni sýnist svo. Væntanlega hefur okkar magnaði forsætisráðherra verið að vísa til þess þegar hún sagði að málinu yrði lokið „með einum eða öðrum hætti“,“ skrifaði Össur, og lauk síðan máli sínu með pillu á þingflokksformann Miðflokksins.
„Það eina sem sætir tíðindum úr þessari umræðu er þegar Bergþór Ólafsson, sem frægur varð af endemum af klúryrðum sínum og drykkjurausi á sögulegu fylleríi Miðflokksins á Klausturbar, notaði tækifærið til að brýna fyrir þingmönnum að vanda orðaval sitt….“.
