Austfirskt par hefur verið ákært vegna viðbragða þeirra við bjölluatri drengja. Náðu þau einum drengnum sem var að gera bjölluat hjá þeim og héldu honum nauðugum á heimili þeirra í nokkrar mínútur.

Austurfrétt greinir frá þessu. „Maðurinn náði taki á úlpu drengsins og dró hann inn í húsið. Þar var drengnum haldið í nokkrar mínútur þar sem vinir hans komu til baka til að sækja hann, þótt hann bæði ítrekað um að fá að fara,“ segir í frétt austfirska fjölmiðilsins.

Maðurinn er ákærður fyrir brot gegn ákvæði um frelsissviptingu og hann og konan eru ákgærð fyrir brot gegn barnaverndarlögum.

„Samkvæmt lýsingu saksóknara sýndi maðurinn af sér yfirgang og ruddaskap ásamt ógnandi og vanvirðandi hegðun en barnið meiddist á hálsi. Konan er ákærð fyrir hlutdeild í broti mannsins með að taka á móti þeim og hleypa barninu ekki út,“ segir ennfremur í fréttinni.

Foreldrar drengsins gera kröfu um hálfa milljón króna í miskabætur.